Sylwer: Ni chaniateir pysgota ar 23 a 24 Gorffennaf.
Mae Parc Margam yn ardd a thirwedd restredig Gradd I, lle cewch eich amgylchynu gan goed, llwyni a blodau hardd, plannu clasurol a modern, llynnoedd a golygfeydd eang sydd wedi esblygu ers y cyfnod canoloesol.
Mae Gerddi Margam yn cael eu datblygu’n barhaus gyda’r nod, dros amser, o ddod yn un o’r gerddi mwyaf diddorol yn Ne Cymru.
Mae Perllan Gymunedol a Dôl Margam yn brosiect cydweithredol rhwng staff y parc a gwirfoddolwyr o Gyfeillion Parc Margam, gan greu gofod cynhyrchiol a chyfoethog o ran rhywogaethau sy’n cysylltu pobl â threftadaeth, bwyd a natur. Wedi’i leoli o fewn yr ardd gegin gaeedig hanesyddol, mae’r prosiect yn adfer coed afalau a gellyg presennol ochr yn ochr â phlannu newydd, sy’n cynnwys amrywiaethau treftadaeth Cymreig, llwyni ffrwythau, perlysiau a llysiau. Mae’r ardaloedd cyfagos yn cael eu rheoli fel dôl blodau gwyllt. Mae gwirfoddolwyr yn chwarae rhan allweddol wrth lunio a chynnal y gofod, gyda rhaglen gynhwysol o weithgareddau drwy gydol y flwyddyn megis plannu, tocio, cynaeafu a sesiynau bioamrywiaeth. Caiff y prosiect ei ariannu gan Lywodraeth Cymru a Chronfa Dreftadaeth y Loteri Genedlaethol drwy gynllun Lleoedd Lleol ar gyfer Natur, gyda chefnogaeth gan The Orchard Project. Os hoffech gymryd rhan, cysylltwch â ni.
Pan brynodd yr Awdurdod y Parc ym 1973, roedd llawer o’r adeiladau a’r gerddi cyfagos mewn cyflwr adfeiliedig, ac ers hynny mae gwaith sylweddol wedi’i wneud i’w hadfer a’u gwella. Mae’r Tŷ Oren, sydd bellach wedi’i adnewyddu, yn ychwanegu at y casgliad eclectig o adeiladau sydd ar yr ystâd. Mae gerddi’r Tŷ Oren yn cynnwys nifer o goed a llwyni diddorol, gan gynnwys sawl Coeden Diwlip fawr, Derwen Gorc ac Ffawydden dail-toredig arbennig o fawr. Mae Camau’r Broadwalk wedi’u hamgylchynu gan rododendronau godidog, a gyflwynwyd i’r parc gan Frank Kingdon-Ward. Gerllaw, fe ddewch ar draws y Casgliad Bambŵ hynod ddiddorol a Gardd Siapaneaidd.
Mae’r Tŷ Sitrws ar gau ar hyn o bryd er mwyn cynnal gwaith cynnal a chadw hanfodol.
Wedi’i henwebu gan David Elward, enillodd ein Coeden Tŷ’r Cabidwl le ar y rhestr fer mewn pleidlais gyhoeddus. Mae’r ffawydden hanesyddol dail-rhedyn yn amgylchynu gweddillion un o’r abatai Sistersaidd cyntaf a sefydlwyd yng Nghymru. Gyda’i chanopi trawiadol, mae’r goeden wedi darparu cysgod i ymwelwyr ers blynyddoedd lawer – o bartïon te Fictoraidd a gynhaliwyd o dan ei changhennau ymledol i fod yn hoff fan picnic haf i ymwelwyr heddiw.
